Dr Satish Upalkar’s article about Oily face upay in Marathi.
चेहरा तेलकट होणे – Oily face in Marathi :
तेलकट चेहरा होण्याची अनेकांना समस्या असते. यांमुळे चेहरा तेलकट आणि चिपचिपा बनतो. तेलकट चेहऱ्यामुळे पिंपल्सही अधिक येत असतात. चेहरा तेलकट झाल्याने त्याठिकाणी हवेतील धूळ व प्रदूषण चिकटते यामुळे चेहऱ्याचे सौंदर्य धोक्यात येते. यासाठी याठिकाणी चेहरा तेलकट का होतो, त्याची कारणे व तेलकट चेहरा यावरील घरगुती उपाय याची माहिती डॉ सतीश उपळकर यांनी येथे सांगितली आहे.
चेहरा तेलकट का होतो ..?
आपल्या त्वचेमध्ये तैलग्रंथीं असतात. त्यातून तेलाचे स्त्रवण होत असते. त्वचेच्या माश्चराइज़साठी ह्या तेलाचे महत्वाचे कार्य असते. मात्र जर त्वचेमध्ये असणाऱ्या तैलग्रंथींची संख्या अधिक असल्यास किंवा त्यातून जास्त प्रमाणात तेल निर्माण होत असल्यास चेहरा अधिक तेलकट होतो.
याशिवाय चेहरा तेलकट होण्यासाठी खालील घटकसुध्दा जबाबदार असतात.
- स्किन केअर प्रोडक्टचा अधिक वापर करत असल्यास चेहरा अधिक तेलकट होतो. कारण यामुळे त्वचेतील छिद्रांवर परिणाम होतो. यामुळेही चेहऱ्याची त्वचा अधिक तेलकट होत असते.
- वातावरणातील बदलांमुळे जसे थंडीच्या दिवसात त्वचा कोरडी पडू नये यासाठी शरीर अधिक प्रमाणात तैलग्रंथींतून तेल निर्माण झाल्याने चेहरा अधिक तेलकट होतो.
- हार्मोन्समधील असंतुलनामुळेही तैलग्रंथी प्रभावित झाल्याने त्वचा अधिक तेलकट होऊ शकते.
- तसेच विशिष्ट औषधांच्या सेवनामुळे आणि मानसिक ताण तणावामुळेही चेहऱ्याची त्वचा अधिक तेलकट होऊ शकते.
तेलकट चेहरा होणे यावरील घरगुती उपाय :
1) चेहरा तेलकट होत असल्यास चेहरा पाण्याने धुवा ..
चेहरा तेलकट होण्याची समस्या असल्यास दिवसातून किमान दोनवेळा चेहरा स्वच्छ पाण्याने धुवावा. यामुळे त्वचेतील अतिरिक्त तेल धूळ व घाम निघून जातो. तेलकट चेहऱ्यासाठी हा सर्वात सोपा आणि फायदेशीर असा घरगुती उपाय आहे. चेहरा धुण्यासाठी फेसवॉशचा वापर करू शकता.
2) तेलकट चेहऱ्याला गुलाबजल लावावे ..
कापसाचा बोळा गुलाबजलमध्ये भिजवून तो बोळा आपल्या चेहऱ्याला सकाळी व रात्री असे दोन वेळा फिरवावा. यामुळे चेहऱ्याच्या त्वचेतील अतिरिक्त तेल, धूळ, प्रदूषण निघून जाईल आणि चेहऱ्याचे सौंदर्यही उजळेल. तेलकट चेहऱ्याच्या समस्येसाठी गुलाबजलाचा घरगुती उपाय खूप फायदेशीर आहे.
3) तेलकट चेहऱ्यासाठी मुलतानी मातीचा लेप वापरा ..
तेलकट होणाऱ्या चेहऱ्यासाठी मुलतानी माती उपयुक्त असते. दोन चमचे मुलतानी माती, एक चमचा दही आणि 2 ते 3 थेंब लिंबूरस या सर्वांचे एकजीव मिश्रण करावे. चेहरा स्वच्छ पाण्याने धुवावा व त्यानंतर वरील लेप चेहऱ्याला लावावा. 20 मिनिटानंतर चेहरा स्वच्छ धुवावा व चांगली माश्चराइज़र क्रीम चेहऱ्याला लावावी. आठवड्यातून 3 वेळा हा फेसपॅक आपण तेलकट होणाऱ्या चेहऱ्यासाठी करावा.
4) तेलकट चेहऱ्यासाठी मसूर डाळीचा फेसपॅक करा ..
अर्धा कप मसूर डाळ रात्रभर पाण्यात भिजत घालावी. सकाळी ती भिजलेली मसूर डाळ चांगली वाटून घ्यावी. यामध्ये थोडेसे दूध मिसळून पेस्ट तयार करावी. हा फेसपॅक चेहऱ्यास लावून 20 मिनिटानंतर चेहरा स्वच्छ धुवावा. आठवड्यातून एक वेळा हा फेसपॅक आपण चेहऱ्याला लावू शकता तसेच या फेसपॅकमुळे आपण चेहऱ्याचे स्क्रबिंग ही करू शकता. या उपायाने चेहऱ्यातील अतिरिक्त तेल दूर होण्यास मदत होते.
5) तेलकट चेहऱ्याला बेसन व हळदीचा लेप लावा ..
चार चमचे बेसन, दोन चमचे मध आणि दोन चमचे हळद यामध्ये गुलाबजल मिसळावे. ह्या मिश्रणाचा लेप चेहऱ्याला लावून 15 मिनिटाने स्वच्छ पाण्याने धुऊन टाकावा. हा फेसपॅक आठवड्यातून एकदा चेहऱ्याला जरूर लावा. यामुळे आपला चेहरा सुंदर व तजलेदार बनेल. उन्हाळ्यात चेहरा तेलकट होण्याची ज्यांना समस्या आहे त्यांच्यासाठी हा घरगुती उपाय खूप उपयोगी आहे.
6) तेलकट चेहऱ्याला कडुनिंब वाटून लावावे ..
कडुनिंबाची 10 पाने घेऊन ती थोडेथोडे पाणी घालून बारीक वाटून घ्यावी त्यानंतर त्यात अर्धा चमचा हळद घालावी व मिश्रण एकजीव करावे. हा फेसपॅक चेहऱ्याला लावून 20 मिनिटानंतर चेहरा स्वच्छ धुवावा. यामुळे चेहऱ्यातील तेल कमी होण्यास मदत होते.
7) चेहरा तेलकट होत असल्यास चेहऱ्याला मध लावा ..
मध हे अँटी-सेप्टीक आणि अँटी-बॅक्टेरियल गुणांचे असल्यामुळे तेलकट चेहऱ्यासाठी उपाय म्हणून उपयुक्त ठरते. यासाठी मध चेहऱ्यास लावून थोड्या वेळाने चेहरा धुवून काढावा.
8) तेलकट चेहऱ्याला कोरपडीचा गर लावा ..
चेहरा तेलकट होत असल्यास आठवड्यातून एकदा कोरफडीचा गर चेहऱ्याला लावावा आणि 15 मिनीटांनी पाण्याने धुऊन टाकावा. तेलकट चेहऱ्याला कोरफडीचा गर खूपच उपयोगी ठरतो. यामुळे चेहऱ्यातील धुळ आणि अतिरिक्त तेल कमी होण्यास मदत होते.
तेलकट होणाऱ्या चेहऱ्यासाठी वर दिलेले घरगुती उपाय खूप उपयोगी पडतात. यामुळे त्वचेतील अतिरिक्त तेल होण्यास मदत होते.
लेखक हे वैद्यकिय तज्ञ आणि आरोग्य क्षेत्रात कार्यरत आहेत. माहिती आवडल्यास आमचे YouTube चॅनल Subscribe करा.
हे सुध्दा वाचा → चेहऱ्यावरील पिंपल्स जाण्यासाठी कोणते उपाय करावेत ते जाणून घेण्यासाठी येथे क्लिक करा.
4 SourcesIn this article information about Oily face Causes, Solution and treatments in Marathi language. This health article is written by Dr Satish Upalkar.