गरोदरपणात पहिल्या महिन्यात ओटीपोटात दुखणे याची कारणे व उपाय

Abdominal Pain During first month of Pregnancy in Marathi.

गरोदरपणात पहिल्या महिन्यात ओटीपोटात दुखणे :

स्त्रीच्या गर्भाशयात गर्भाची वाढ होत असल्याने, गर्भाशयाचे स्नायु खेचले जातात त्यामुळे ओटीपोटातही दुखू शकते. गर्भाशयाच्या आकारात होत असलेली वाढ, त्यामुळे स्नायूंवर येणारा ताण यांमुळे गर्भाशय, योनिमार्ग व ओटीपोटातील इतर अवयव यांकडे खूपच जास्त प्रमाणात रक्तपुरवठा होत असतो. याशिवाय बद्धकोष्ठता, ऍसिडिटी, पोटात गोळा येणे यामुळेही गरोदरपणात पहिल्या महिन्यात ओटीपोटात दुखत असते.

मासिक पाळीच्या वेळी ज्याप्रमाणे ओटीपोटात दुखत असते त्याचप्रमाणे त्रास यावेळीही होत असतो. त्यामुळे मासिक पाळी तर सुरू होणार नाही ना? किंवा दर महिन्याला जसे दुखते तसेच आज दुखत आहे, मी गरोदर आहे की नाही? वैगेरे प्रश्न अनेक जणींना यावेळी पडू शकतात. मात्र अशावेळी काळजी करू नका कारण, गरोदरपणातही ओटीपोटात दुखणे ही एक सामान्य बाब आहे.

ओटीपोटात दुखत असल्यास काय करावे..?

• गरोदरपणात ओटीपोटात दुखत असल्यास थोडी विश्रांती घ्यावी.
• ज्या बाजूला दुखत असेल त्याच्या विरुद्ध बाजूवर झोपून आराम करावा.
• कोमट पाण्याने अंघोळ केल्यानेही त्रास कमी होण्यास मदत होते.
• दिवसभरात पुरेसे पाणी प्यावे.
• उपाशी राहू नये. वरचेवर थोडा थोडा आहार घेत राहावा.
• पोट नियमित साफ होईल यासाठी संतुलित व फायबर्सयुक्त आहार घ्यावा.
• लघवीला वेळच्यावेळी जावे. लघवी अधिककाळ थांबवून ठेऊ नये.
• एकाच ठिकाणी अधिकवेळ बसणे किंवा उभे राहणे टाळावे.

डॉक्टरांकडे कधी जाणे गरजेचे असते..?

अधिक तीव्रतेने ओटीपोटात दुखत असल्यास, योनीतुन रक्तस्त्राव किंवा पाणी जात असल्यास, उलट्या होत असल्यास आपल्या स्त्रीरोगतज्ञांचा तात्काळ सल्ला घेणे आवश्यक आहे.

Abdominal Cramping & Stomach pain During first month of Pregnancy Causes, Treatment & Prevention in Marathi.