पाच महिन्याच्या बाळाचा आहार, वजन आणि घ्यायची काळजी : डॉ सतीश उपळकर

Dr Satish Upalkar’s article about 5 months baby care tips in Marathi.

पाच महिन्यांचे बाळ :

बाळाच्या जन्मापासूनच ते बाळ थोडे मोठे होईपर्यंत विशेष काळजी घेणे आवश्यक आहे. या लेखात पाच महिन्याच्या बाळाला कोणता आहार द्यावा, त्याला काय खाऊ घालायचे तसेच या महिन्याच्या बाळाची काळजी कशी घ्यावी याविषयी माहिती डॉ सतीश उपळकर यांनी सांगितली आहे.

पाच महिन्याच्या बाळाचे वजन आणि उंची :

प्रत्येक बाळाचा शारीरिक विकास वेगवेगळा असतो.
बालकाचे (baby boy) चे वजन 6.1 ते 9.2 किलो आणि उंची 68 सेमी पर्यंत इतकी असू शकते.
तर बालिकेचे (baby girl) चे वजन साधारण वजन 5.5 ते 8.7 किलो असते आणि उंची सुमारे 65 सेमी पर्यंत असू शकते. वयानुसार बाळाचे वजन व उंची किती असावी ते जाणून घ्या..

पाच महिन्यांच्या बाळातील विकासाचे टप्पे :

• बाळाची मान धरते. मानेचा तोल सावरता येतो.
• डोके वर उचलू शकते.
• हातावर ताबा येतो.
• दुसऱ्या बाजूवर पालथे होण्याचा प्रयत्न करीत असतात.
• खेळणी अधिक आवडू लागतात.
• यावेळी वजन हे जन्म वजनाच्या दुप्पट होते.

पाच महिन्याच्या बाळाचा आहार असा असावा :

पहिले सहा महिने नवजात बालकाचा आहार म्हणजे आईचे दूध हेचं असते. त्यामुळे पाचव्या महिन्यातही बाळाला स्तनपान करावे. पाच महिन्याची बालके दिवसभरात सहा ते सात वेळा स्तनपान करू शकतात. आईचे दुध सोडून बाळास इतर कोणताही आहार 5व्या महिन्यात देऊ नये. त्यामुळे बाळास पाणी, ग्राईप वॉटर, ग्लुकोजचे पाणी, फळांचा रस, गुटी वैगरे काहीही देऊ नये.

काही परिस्थितीत बाळास आईचे दूध देता येत नसल्यास पावडरचे फॉर्म्युला दूध दिले जाते. पाचव्या महिन्यात फॉर्म्युला दूध देताना बाळाला पाच ते सहा वेळा फॉर्म्युला दूध दिले पाहिजे.

पाच महिन्याच्या बाळाची झोप :

पाच महिन्याचे बाळ 12 ते 15 तास झोप घेत असते. बाळाची वाढ आणि विकासासाठी पुरेशी झोप घेणे आवश्यक असते.

पाचव्या महिन्यात बाळाच्या विकासासाठी हे करा :

पाचव्या महिन्यातही बाळाला काही वेळ पोटावर झोपवावे व त्याच्या समोर खेळणी ठेवावी. त्यामुळे बाळ आपले डोके व खांदे वर उचलतात. त्यामुळे त्याची मान, पाठ खांदा येथील मांसपेशी मजबूत होतात व बाळाची मान धरते तसेच बाळ पालथे होण्यास शिकते. याशिवाय,

• अंघोळ घालण्यापूर्वी बाळाला मालिश करावी.
• बाळाला रंगीबेरंगी खेळणी आणून द्यावीत.
• बाळाबरोबर खेळण्यांनी खेळावे.
• बाळाला झोपवताना छान छान अंगाई गीते म्हणावीत.

डॉक्टरांकडे कधी जावे..?

पाचव्या महिन्यात बाळ दूध पीत नसल्यास किंवा त्याला ताप, अतिसार, उलट्या, सर्दी, खोकला असे त्रास झाल्यास बाळाला डॉक्टरांकडे घेऊन जावे.

हे सुध्दा वाचा – 6 महिन्याच्या बाळाची काळजी कशी घ्यावी ते जाणून घेण्यासाठी येथे क्लिक करा.

In this article information about 5 months baby care, weight and diet plan in Marathi language. This health article is written by Dr Satish Upalkar (Certified physician and Healthcare expert).