टाचेला भेगा पडणे यावर घरगुती उपाय

Medical Author – डॉ. सतीश उपळकर
© हेल्थ मराठी डॉट कॉम

टाचेला भेगा पडणे :

थंडीच्या दिवसात किंवा अनवाणी चालणे, आरामदायी चपला न वापरणे, अधिक काळ उभे राहण्याची सवय यासारख्या अनेक कारणांमुळे पायाच्या टाचेला भेगा पडत असतात. टाचेला भेगा पडणे ह्याचा त्रास अनेकांना होत असतो. यासाठी येथे टाचेला भेगा पडणे यावर उपाय यांची माहिती खाली दिली आहे.

टाचेला भेगा पडणे उपाय :

मध..
त्वचा नैसर्गिकरीत्या मॉइश्चराइज करण्यासाठी मध खूप उपयोगी ठरते. तसेच टाचेच्या भेगा भरून काढण्यासाठी मधातील अँटी-मायक्रोबियल व अँटी-बॅक्टेरियल गुणधर्म उपयुक्त ठरतात. यासाठी रोज रात्री झोपण्यापूर्वी टाचा स्वच्छ धुवून त्याठिकाणी मध लावावे. यामुळे टाचेच्या भेगा लवकर कमी होतात.

खोबरेल तेल –
खोबरेल तेलसुद्धा त्वचा मॉइश्चराइज करण्यास मदत करत असते. त्यामुळे टाचेला भेगा पडल्यास त्यावरही खोबरेल तेल खूप उपयोगी ठरते. भेगा पडलेल्या टाचेच्या ठिकाणी खोबरेल तेल रोज रात्री झोपण्यापूर्वी लावावे. यामुळे भेगा पडलेली डेड स्किन निघून जाण्यास, त्वचा मऊ मुलायम होण्यास मदत होते.

कडुनिंबाचा रस –
टाचेला भेगा पडल्यास कडुनिंबाची पाने बारीक वाटून त्याचा रस काढून भेगा पडलेल्या टाचेला लावल्यास भेगा लवकर कमी होतात.

हळद –
हळदीमध्ये अँटी-बॅक्टेरियल गुणधर्म असतात. त्यामुळे जखमा भरून येण्यास मदत होते. यासाठी हळदीमध्ये कोमट तेल टाकून मिश्रण तयार करून ते टाचेच्या भेगांवर लावावे. हळदीचे अन्य आरोग्यदायी फायदेही जाणून घ्या..

औषधी मलम..
टाचेला भेगा पडल्यास त्याठिकाणी औषधी मलम किंवा मॉइस्चराइजर क्रीम लावणेही फायदेशीर असते. त्यामुळे भेगा पडलेली त्वचा मॉइश्चराइज होऊन डेड स्किन निघून जाते व त्वचा मऊसर होऊन भेगांचा त्रास कमी होतो. यासाठी रोज रात्री झोपण्यापूर्वी पाय स्वच्छ धुवून त्याठिकाणी औषधी मलम किंवा मॉइस्चराइजर क्रीम लावावी.

टाचेला भेगा पडू नये यासाठी काय काळजी घ्यावी..?

• बाहेर अनवाणी पायी चालू नये.
• अधिक काळ उभे राहणे टाळावे.
• बाहेर फिरताना टाचेचा मातीशी संपर्क येणार नाही, याची काळजी घ्यावी.
• पायांचे तळवे व टाचा यांना योग्य Support देणारे व आरामदायी असणारे चपला वापराव्यात.
• पायांना जास्त टाईट होणारे बूट वापरू नयेत.
• दिवसभरात पुरेसे म्हणजे साधारण 8 ग्लास पाणी प्यावे. यामुळे शरीर हायड्रेट राहून त्वचा कोरडी (ड्राय स्किन) पडत नाही.

टाचेला भेगा पडणे हा त्रास डायबेटीसच्या रुग्णांना असल्यास त्यांनी जास्त काळजी घेणे गरजेचे आहे. अशावेळी त्यांनी आपल्या डॉक्टरांकडून यावर उपचार घ्यावेत तसेच पायाची नियमित तपासणीही करून घ्यावी.

कारण डायबेटीस असल्यास आणि टाचेला भेगा पडणे याकडे दुर्लक्ष केल्यास त्याठिकाणी जखमा वाढून डायबेटिक न्युरोपॅथी, डायबेटिक फूट अल्सर आणि इन्फेक्शन होण्याचा धोका वाढतो.

© कॉपीराईट सुचना -
कृपया ह्या वेबसाईटमधील माहिती कॉपी-पेस्ट करू नये. येथील माहिती कॉपी करून आपल्या नावाने प्रसिद्ध किंवा शेअर किंवा Video बनवता येणार नाही.