चिकुनगुन्‍या (Chikungunya)

8380
views

चिकुनगुन्‍या म्हणजे काय..?
चिकुनगुन्‍या हा डासामार्फत पसरणारा एक विषाणुजन्य आजार आहे. विषाणू संक्रमित एडीस इजिप्ती आणि एडीस अल्बोपिक्टस मादी डास एखाद्या व्यक्तीला चावल्यास त्या व्यक्तीमध्ये हे विषाणु पसरतात व त्याला चिकुनगुन्‍याची लागण करतात. हे डास साधारणपणे दिवसा सकाळच्या व दुपारच्या वेळी चावणारे असतात. थंडी वाजून भरपुर ताप येणे, त्वचेवर पुरळ येणे, तीव्र सांधेदुखी हे आजाराचे प्रमुख लक्षणे आहेत.

चिकुनगुन्‍याची लक्षणे :
चिकुनगुन्‍या आजाराची सुरुवात अचानक खालील लक्षणांसह होते.
• भरपुर ताप येणे. ताप 104 अंश सेल्सिअसपर्यंत पोहोचू शकतो.
• ‎हुडहुडी भरणे, थंडी वाजुन येणे.
• ‎सांधेदुखणे, सांध्यांच्या ठिकाणी प्रचंड वेदना होतात.
• ‎उलट्या होणे, मळमळणे.
• ‎डोके व डोळे दुखणे.
• ‎अंगावर पुरळ येणे, प्रामुख्याने पुरळ हे हातपाय व पाठीवर दिसुन येतात.
आजाराची लक्षणे साधारणतः चिकनगुनियाचा डास चावल्‍यावर 3 ते 7 दिवसानंतर दिसून येतात.

चिकुनगुन्‍याचे निदान :
चिकुनगुन्‍या आजाराचे निदान ELISA या रक्‍त तपासणीव्‍दारे करण्‍यात येते. ELISA ही रक्त चाचणी करुन चिकुनगुन्‍या या आजाराचे निदान केले जाते. चिकुनगुन्‍याची लक्षणे ही डेंग्यू आजाराशी मिळतीजुळती असल्याने ELISA तपासणीतून नेमके निदान होण्यास मदत होते. याशिवाय CBC Test, RT-PCR test सुद्धा केली जाते.

चिकनगुनिया उपचार :
चिकनगुनिया आजाराकरीता विशिष्‍ट असा औषधोपचार उपलब्‍ध नाही. जवळपास सर्व रुग्णांमध्ये  हा आजार  ठराविक कालावधीनंतर पुर्णपणे बरा होतो त्यामुळे काळजी करण्याचे कारण नाही.
• थंडी वाजून ताप येणे, अचानक सांधेदुखी होणे यासारखी लक्षणे दिसून येत असल्यास डॉक्टरांकडून रोगाचे निदान व उपचार करून घ्या.
• ‎या आजारात लक्षणांनुसार उपचार असतात यासाठी वेदनाशामक औषधे (उदाहरणार्थ पेरासिटामॉल) दिली जातील. डिहायड्रेशन होऊ नये म्हणून सलाईन, ओआरएस द्रवपदार्थ दिले जातात.
• ‎ताप आलाय म्हणून या आजारात ऍस्प्रिन गोळी घेऊ नये.
• ‎रुग्णाने पुरेशी विश्रांती घ्यावी.
• ‎चिकुनगुन्‍या झालेल्या रुग्णाला डास चावू नये, याकरीता काळजी घ्‍यावी. जेणेकरुन इतर व्‍यक्तिमध्‍ये आजाराचा प्रसार होणार नाही.

चिकुनगुन्‍या आजाराची तीव्रता कमी व्हायला तीन दिवसापासुन सुरवात होते व दोन आठवड्यापर्यंत रुग्ण पुर्ण बरा  होतो. वयस्कर लोकांमध्ये पुर्ण बरे होण्यासाठी तीन महिन्यापर्यंत कालावधी लागू शकतो. तर काही रुग्णांमध्ये आजारात होणारी सांधेदुखी एक वर्षापर्यंतही राहु शकते.

इतर विविध संसर्गजन्य रोगांची माहितीसुध्दा वाचा :
खालील सर्व प्रमुख संसर्गजन्य रोगांची माहिती मराठीमध्ये हवी असल्यास येथे क्लिक करा..
डेंग्‍यू ताप, मलेरिया, चिकुनगुन्‍या, लेप्टोस्पायरोसिस, स्वाईन फ्लू, निपाह वायरस, गोवर, वाऱ्याफोड्या, जर्मन गोवर, कांजिण्या, नागीण, काविळ, हिपॅटायटीस, टायफॉईड, गालफुगी, टॉन्सिल्स सुजणे, डांग्या खोकला, न्यूमोनिया, घटसर्प, क्षयरोग TB, कुष्ठरोग, एड्स HIV यासारख्या सर्व प्रमुख संसर्गजन्य रोगांची माहिती जाणून घेण्यासाठी येथे क्लिक करा.

हे करा..
चिकुनगुन्‍या होऊ नये म्हणून ह्या करा प्रतिबंधात्मक उपाययोजना :
• कोणताही ताप अंगावर काढू नका.
• ‎कोणत्याही तापावर डॉक्टरांसल्ल्याशिवाय परस्पर औषधे घेणे टाळावे. ताप सदृश्य लक्षणे जाणवल्यास तात्काळ डॉक्टरांकडे जावे व निदान आणि उपचार करून घ्यावे.
• ‎डासांपासून रक्षण करणे हाच सर्वोत्तम उपाय आहे. आपल्या घराशेजारी कचरा, सांडपाणी साचू देऊ नये. घराचा व आजूबाजूचा परिसर स्वच्छ ठेवा.
• ‎घराच्‍या भोवताली व छतांवर वापरात नसणारे टाकावू टायर, बाटल्या इ साहित्‍य ठेऊ नये.
• ‎घरातील दारे आणि खिडक्यांना डास प्रतिबंधक जाळ्या लावाव्यात.
• ‎ चिकुनगुन्‍या पसरवणारे डास विशेषतः सकाळच्या व दुपारच्या वेळी वावरत असतात. त्यामुळे सकाळच्या व दुपारच्या वेळी डासनाशक औषधांचा वापर करावा. शक्‍यतो पूर्ण अंग झाकेल असे कपडे वापरावेत.

– डॉ. सतीश उपळकर
CEO, हेल्थ मराठी नेटवर्क

चिकुनगुन्‍या म्हणजे काय, चिकुनगुन्‍या कशामुळे होतो, चिकुनगुन्‍याची कारणे, चिकुनगुन्‍याची लक्षणे, चिकनगुनिया उपचार माहिती, चिकुनगुन्‍यापासून बचाव कसा करावा, डासांपासून होणारे आजार, चिकुनगुन्‍या टाळा, Chikungunya mahiti Marathi, Chikungunya information in Marathi, Chikungunya causes in Marathi, diagnosis Chikungunya marathi mahiti, Chikungunya sign symptoms in Marathi, Chikungunya Treatment in Marathi, Chikungunya prevention tips marathi,

आपली प्रतिक्रिया द्या :
वरील माहिती आपणास कशी वाटली? किंवा आपल्या काही आरोग्य विषयक समस्या, प्रश्न असल्यास आम्हाला कळण्यासाठी येथे क्लिक करा. आमचे तज्ञ डॉक्टर आपल्या विविध प्रश्नांचे निश्चितच समाधान करतील.